ثورة لها بين المحاور محور.. لشاعر الأحرار مهدي أحمد مفلح

اشمخ على ذا الكون يا سبتمبر

فيك انبلج فجر الشرف واتربع

ثورة لها في الكون موقف يشكر

ولها على بيض الضماير موقع

ثورة تحدت كل بغي ومنكر

والباطل اقسم لليمن ما يرجع

ثورة لها بين المحاور محور

خيره لكل المنطقة يتوزع

ثورة لها تاريخ تحت المجهر

في وقتنا للحق وأهله ينفع

فيه الفنا والموت للمستعمر

ويحط أقوى جيش في مستنقع

أخرج بها الشعب اليماني وأظهر

نخوة تفتح أذن لي ما يسمع

في ملحمة تكتب بنار المعبر

وجنودها ف النصر مطلع مطلع

واصبح لغزة وأهل غزة يثأر

وداس كل أخطارها واستمتع

والكل عن حرب اليهود اتقهقر

كانوا يروهم خزق ما يترقع

لكن يمنا الحر من سبتمبر

غامر وهز الكفر ذي يتجمع

في صبر عمار بن ياسر شمر

والبحر الأحمر من جحيمه ولع

والشعب في الساحات مثل العسكر

ثابت على مبداه لو يتقطع

ثابت ثبات الصخر ما هو مجبر

وكل ما زاد الأذى يتوسع

وأقسم برب العرش ما حد يقدر

يرجعه قل لليهودي يرجع

با يستمر بالرد حتى ينصر

والغازي المحتل بيده يقلع

ما ركعه بالعاصفة حلف الشر

يا ذي تبى الشعب اليماني يركع

ارفع يدك عن حرب غزة يا أغبر

وآخر مصيرك بالهزيمة تقنع